أمهل كابو الفصيل المشجع لنادي اتحاد طنجة “هيركوليس” المكتب المسير، يومين لتقديم الاستقالة، وذلك عبر تدوينة له على حائطه في “فايسبوك”.
وذكر في التدوينة: “هاد الحالة دالركود لي دايرة الآن ما فالصالح دحتى واحد، و عدم انعقاد الجمع العامّ عندو أثر سلبي كبييييييير على السيرورة دالفريق فالنصف الأول دالموسم و عليه كا نعاود نطالب أي واحد من هادو لي غا نذكر يقوم بالدّور ديالو فخاطر المدينة و الفريق و الجمهور باش هاد الأخير ما يهبطشي نالشارع و نزيدو نعطّلو لي أصلاً معطلين الله يرحملكم الوالدين كا نعاودا لمصلحة الفريق :
1. المكتب ما عارفشي واش حشمانين ولا ما باغينشي يخرجو فحالوم راه إذا زيدتو تعطلتو عاد بنادم غا يحقد، صافي الواقع مفروض و الاستقالة لا محال منها، فالله يعزّكوم ما تزيدوشي تحرقو الفرقة و الأوراق ديالكوم و نزّلو السوارت راه ما بقا ما يزيد يتّصبر و إذا ما كانتشي الاستقالة فاليومين القادمين غا تكون ردّة فعل من المجموعة والجمهور عامّة”.
وأضاف:” نطالبوا من الولاية و على رأسها السيّد الوالي أنه يكون على رأس اختيار الناس لي غا يسيّرو فاللجنة و الله يجازيه يحاول يوفّر و يعاون خصوصاً فالمرحلة الأولى، حيت الشغول لي تابع هاد الناس ماشي ساهل بلحاق غا يسهل بالمساعدة ديالك السيّد الوالي و نحن نثق فيكم تخلّيو خطوات لي غا يتفكروك بيها سكّان مدينة مليونية فريقها المحلّي هو لي كي دخّل عليها الأفراح”.
وتابع: “الجمهور خصو يكون عارف راسو علاش داخل، داخلين على مرحلة كحلة و صعيبة أقل مدّة فيها هي 4 أشهر أو 5 حتى يتفتح الميركاطو، هادشي إذا ما عتقناشي الجرّة قبل و كا نظن بتدخل شخصي دالسيّد الوالي و الرجال دالمدينة نقدرو نعملو ما أحسن”.
واختتم: “السّي الشرقاوي، أنس المرابط نحن لا ننسى ما تمّ تقديمه في حقّ الفريق و كذلك ما لم يتم تقديمه، فما تخليوشي واحد الكفّة تغلّب على أخرا و هادي ماشي هزيمة، هادي تسبيق نالمصلحة دالفريق لي حنا مواليناه و جات الساعة لي الجمهور ختار بلي الساعة دالخدمة ديالكوم نالفرقة تسالات. فعجّلوا بتقديم الاستقالة قبل فوات الأوان، و موراها غا نشوفو القضيّة دالشركة”.